Samir Abbasov 1980-yili Ozarbayjon Respublikasining Ujar tumanida tugʻilgan. 1998-yili Boku Davlat Universitetining Kutubxonashunoslik-Axborot fakultetiga oʻqishga kirib, 2002-yilda ushbu fakultetni muvaffaqiyatli tamomlaydi.
2002-2004-yillarda Kutubxonashunoslik-Axborot fakultetida bibliografiya ixtisosligi boʻyicha magistr darajasini oladi va Boku Davlat Universitetini qizil diplom bilan tamomlaydi. Hozirgi kunda Ozarbayjon Milliy Fanlar Akademiyasining M.Fuzuliy nomidagi Qoʻlyozmalar institutining doktoranti.
Mehnat faoliyatini Jafar Jabborli nomidagi Respublika Yoshlar kutubxonasida ‒ kutubxonachi, bibliograf, Ozarbayjon Respublikasi Prezidenti maʼmuriyatining Prezident kutubxonasida mutaxassis, yetakchi mutaxassis, Ozarbayjon Respublikasi Madaniyat va Turizm Vazirligining Madaniyat siyosati boʻlimida hamda Nashriyot, reklamani tashkil etish, axborot boʻlimida maslahatchi vazifalarida ishlagan.
2013-yilning fevral oyida Oʻzbekiston Respublikasidagi Ozarbayjon elchixonasi qoshidagi Haydar Aliyev nomidagi Madaniyat Markazi direktori etib tayinlangan. S.Abbasov, shuningdek, Ozarbayjonning Oʻzbekistondagi elchixonasining madaniyat, turizm, taʼlim va diaspora masalalari boʻyicha birinchi kotibi hamdir.
U 2008-2013 yillarda “Ozarbayjon Respublikasida Kutubxona-Axborot sohasini rivojlantirish” boʻyicha Davlat Dasturining Tadbirlar Rejasi”ni ishlab chiqishda ishtirok etgan. 2009-2010-yillarda Ozarbayjonning kitob yodgorliklari reestrini yaratish loyihasining koordinatori boʻlib faoliyat yuritgan.
2010-yilda esa S.Abbasov rahbarligida “Vayron qilingan kutubxonalar va yoʻq qilingan madaniy qadriyatlar” nomli loyiha amalga oshirildi. Loyiha natijasida ilk marta bosib olingan barcha hududlarda vayron qilingan kitob xazinalari oʻrganilib, ularning hajmi va Ozarbayjonn madaniy merosiga yetkazilgan zarar aniqlanib, Ozarbayjon Respublikasi Madaniyat va Turizm Vazirligi loyihasi bilan bu mavzuda 3 tilda (ozarbayjon, rus va ingliz) kitob nashr etildi.
2013-yilning fevral oyidan boshlab Ozarbayjon Respublikasining Madaniyat va Turizm Vazirligining tavsiyasiga koʻra Ozarbayjon Respublikasi Tashqi Ishlar Vazirligining tegishli buyrugʻi bilan Oʻzbekiston Respublikasidagi Ozarbayjon Elchixonasi qoshidagi Haydar Aliyev nomidagi Madaniyat Markazining direktori etib tayinlanadi. S.Abbasov Ozarbayjon Respublikasining Oʻzbekiston Respublikasidagi Elchixonasining madaniyat, turizm, taʼlim va diaspora masalalari boʻyicha birinchi kotibidir.
S.Abbasov Ozarbayjon tarixi, madaniyati, adabiyotiga oid 100 dan ortiq kitoblarni nashr etishda rahbarlik qilgan, 5 ta hujjatli film senariysi muallifi, shuningdek, har yil Oʻzbekiston matbuotida oʻlkamizga doir yuzlab chop etilgan maqolalar muallifidir.
Tarixda ilk marta Ozarbayjon Madaniyat Markazi loyihasi bilan atoqli Ozarbayjon shoiri Nizomiy Ganjaviyning Xamsasidan joy olgan besh doston Oʻzbekiston xalq shoiri Jamol Kamol tomonidan asl nusxadan oʻzbek tiliga tarjima qilindi hamda 2021-yilda asarlar alohida-alohida Nizomiy Ganjaviy yili munosabati bilan Toshkentda chop etildi. Ushbu anʼana davom ettirilib, Ozarbayjon klassik adabiyotining taniqli shoirlari, mutafakkirlari, yozuvchilarining asarlari (Imodiddin Nasimiy, Muhammad Fuzuliy, Shoh Ismoil Xatoiy, Mulla Panoh Voqif, Sayid Azim Shirvoniy, Mirzo Alakbar Sobir, Xurshidbonu Notavon, Aziza Jafarzoda, Anor, Yunus Oʻgʻuz) oʻzbek tiliga tarjima qilinib, nashr etiladi, har ikki mamlakatning Tilshunoslik instituti ishtirokida Ozarbayjoncha-Oʻzbekcha, Oʻzbekcha-Ozarbayjoncha lugʻat va soʻzlashuv kitoblari tayyorlanib, nashr etiladi. Ozarbayjon folklori namunalari, “Kitabi Dada Qoʻrqud” dostoni, Ozarbayjon maqollari kitobi oʻzbek tiliga oʻgirilib, chop etiladi.
Samir Abbasov “Ozarbayjon, Qarabogʻ, sulh va gʻalaba uchun oʻqi” musiqiy klipining gʻoya muallifi va badiiy rahbaridir. Uning rahbarligi ostida “Wikipedia.org” Xalqaro Elektron Ensiklopediyada Ozarbayjonga doir oʻzbek tilida yuzlab boʻlimlar yaratildi. Hozirda ushbu loyiha davom ettirilmoqda.
2014-2023-yillarda Ozarbayjon Madaniyat Markazining tashabbusi bilan Oʻzbekistonning 7 ta yetakchi universitetlarida, madaniyat muassasalarida Ozarbayjon burchaklari va markazlari yaratilib, Markaz koʻmagida Ozarbayjon milliy madaniyati, shuningdek, Oʻzbekiston bilan doʻstlik aloqalarini keng targʻib qilish ishlari olib borilmoqda.
2023-yilda Ozarbayjon Madaniyat Markazi tashabbusi va loyihasi bilan Toshkent Davlat Sharqshunoslik universitetida Ozarbayjon tili fakulteti yaratilib, shuningdek, oliy oʻquv yurtida Ozarbayjon tili fakulteti faoliyat yuritishi uchun milliy uslubda Haydar Aliyev auditoriyasi tashkil etildi.
Samir Abbasov 2015-2017 yillarda Ozarbayjon Respublikasi Tashqi Ishlar Vazirligining Faxriy yorliqlari va tashakkurnomalari, 2016-yilda Oʻzbekiston-Ozarbayjon madaniy aloqalarini rivojlantirishdagi alohida xizmatlari uchun Oʻzbekiston Respublikasi Madaniyat vazirligining faxriy yorligʻi, 2017-yilda Turk dunyosi mamlakatlari oʻrtasidagi adabiy aloqalar, bu yoʻnalishdagi koʻplab loyihalari uchun “TURKSOY” tashkilotining medali, Ozarbayjon va Oʻzbekiston oʻrtasidagi fan va adabiyot sohasidagi hamkorlikni rivojlantirishdagi xizmatlari uchun Ozarbayjon Milliy Fanlar Akademiyasining faxriy diplomi, 2018-yilda esa Ozarbayjon-Oʻzbekiston orasidagi madaniyat sohasidagi aloqalarni mustahkamlagani, alohida tashabbusi va ilgʻor faoliyati uchun Ozarbayjon Respublikasining “Faxriy Madaniyat xodimi” medali bilan taqdirlangan.
2019-yili muvaffaqiyatli diplomatik faoliyati uchun Ozarbayjon Respublikasining Tashqi ishlar vazirligi Ozarbayjon diplomatik organlari tashkil etilganining 100 yilligi medali, 2020-yilda Ozarbayjonni tanitish va targʻib qilish, boshqa tomon bilan doʻstlik aloqalarini mustahkamlashdagi xizmatlari uchun Ozarbayjon Respublikasining Diaspora bilan ishlash Davlat Qoʻmitasining medali, 2021-yilda esa Oʻzbekiston Respublikasi Prezidenti tomonidan taʼsis etilgan “Doʻstlik” medali bilan taqdirlangan.
2022-yil uchun Oʻzbekistonning yetakchi ommaviy axborot vositalari vakillari, koʻplab respondentlar, taniqli shaxslar, jamoatchilik vakillari, jurnalist va blogerlar orasida, jami 10 mingdan ortiq respondentlar oʻrtasida oʻtkazilgan onlayn soʻrov natijalariga koʻra, Oʻzbekistonda faoliyat yuritayotgan xorijiy mamlakatlarning tashkilotlari orasida “Yilning eng faol Madaniyat Markazi” nominatsiyasida Oʻzbekistondagi Haydar Aliyev nomidagi Ozarbayjon Madaniyat Markazi gʻolib deb topilib, Ozarbayjon Madaniyat Markaziga faxriy mukofot topshirildi.
