XABARLAR 2022
O‘zbekistonda “Turkiston va Kavkazning noyob tarixiy xaritalari” nomli Ozarbayjon-O‘zbekiston-Turkiya ko‘rgazmasining ochilishi bo‘lib o‘tdi
O‘zbekistondagi Haydar Aliyev nomidagi Ozarbayjon Madaniyat Markazi va Anqaradagi Turk tarixi va Madaniyati fondi loyihasi asosida Nizomiy nomidagi Toshkent Davlat Pedagogika universiteti markaziy foyesida “Turkiston va Kavkazning noyob tarixiy xaritalari” nomli Ozarbayjon-O‘zbekiston-Turkiya ko‘rgazmasining ochilishi bo‘lib o‘tdi.
Ko‘rgazmada ko‘p asrlar mobaynida turkiylar yashagan hududlarni aks ettiruvchi xaritalar, Sharqiy Turkiston, buyuk geograflarning Markaziy Osiyo, bugungi turkiy davlatlar, qadimgi Ozarbayjon davlatlari hududlarini aks ettiruvchi tarixiy xaritalar, Kavkazning eng qadimgi, o‘rta asrlar, shuningdek, Sovet davriga qadar tarixiy xaritalari hamda mustaqillik uchun kurashga bag‘ishlangan fotosuratlar namoyish etildi.
Taqdimot marosimida O‘zbekistondagi Haydar Aliyev nomidagi Ozarbayjon Madaniyat Markazi, Turkiya elchixonasi diplomatlari, O‘zbekiston hukumati vakillari, O‘zbekiston-Ozarbayjon Do‘stlik Jamiyati rahbariyati, ilm, madaniyat, ta’lim sohasining ko‘zga ko‘ringan namoyandalari, o‘qituvchi va talabalar, jurnalistlar ishtirok etdi.
Ko‘rgazmada O‘zbekistondagi Haydar Aliyev nomidagi Ozarbayjon Madaniyat Markazi va Anqaradagi Turk tarixi va Madaniyati fondi xaritalari to‘plamlaridan foydalanildi.
13.12.2022