XABARLAR 2023
O‘zbekistondagi Qo‘qon shahar Amiriy nomidagi axborot-kutubxona markaziga Ozarbayjonga oid kitoblar to‘plami sovg‘a qilindi.
O‘zbekistondagi Haydar Aliyev nomidagi Ozarbayjon Madaniyat Markazi loyihasi asosida bu o‘lkadagi Qo‘qon shahar Amiriy nomidagi axborot-kutubxona markaziga Ozarbayjon o‘lkasiga oid boy kitoblar to‘plami sovg‘a qilindi.
Mehmonlar uchun dastavval kutubxonaga ekskursiya tashkil etilib, uning bo‘limlari va kutubxonaga kelgan turli yosh toifalari uchun maxsus kitob o‘qish xonalari bilan tanishtirildi.
Tadbirda chiqish qilgan Qo‘qon shahar Amiriy nomidagi axborot-kutubxona markazi direktori Rustam Xusanov kutubxonalarning jamiyatdagi roli, O‘zbekiston Respublikasi Prezidenti Shavkat Mirziyoyevning kitob va mutolaaga qaratayotgan e’tibori, kutubxona ilmining davlat siyosati darajasiga ko‘tarilgani kabi muhim masalalar haqida gapirdi. U Qo‘qon shahar Amiriy nomidagi axborot-kutubxona markaziga O‘zbekistondagi Haydar Aliyev nomidagi Ozarbayjon Madaniyat Markazi tomonidan sovg‘a qilingan kitoblar ikki qardosh o‘lka o‘rtasidagi do‘stlik ko‘prigi sifatida rol o‘ynashini ta’kidlab aytdi.
O‘zbekistondagi Haydar Aliyev nomidagi Ozarbayjon Madaniyat Markazi direktori Samir Abbosov tadbirda chiqish qilib, O‘zbekistondagi kutubxona fondlarining Ozarbayjon haqidagi nashrlar bilan boyitilishi uchun muhim loyihalar amalga oshirilishi va bugunga qadar Ozarbayjon Madaniyat Markazi tomonidan har yili minglab kitoblar ham poytaxt kutubxonalariga, ham ta’lim muassasalariga, O‘zbekistonning boshqa hududlariga ham taqdim etilganini bildirdi. Diplomat o‘zi rahbarlik qilayotgan Markazning loyihalari asosida bugungi kunga qadar Ozarbayjon bilan bog‘liq 100 dan ortiq kitob o‘zbek tiliga tarjima qilinib, nashr etilgani haqida ham gapirdi.
Sovg‘a qilingan nashrlar orasida ulug‘ yo‘lboshchi Haydar Aliyevning hayoti va faoliyati, Prezident Ilhom Aliyevning rahbarligi bilan Ozarbayjon o‘lkasining iqtisodiy inkishofi haqida so‘z yuritilgan kitoblar, “Qorabog‘ haqiqatlari” nomli seriyada Haydar Aliyev Fondi tomonidan rus va ingliz tillarida chop etilgan kitoblar bor.
Kitoblar to‘plamida Ozarbayjon Madaniyat Markazining o‘zbek tilida Ozarbayjon tarixi, davlatchiligi, madaniyati, adabiyoti bilan bog‘liq Toshkentda chop ettirgan kitoblari, o‘tmishdagi Qorabog‘ ziddiyatlariga oid kitoblar ham joy olgandir.
Ushbu kitoblar to‘plamida Ozarbayjon Madaniyat Markazining loyihasi asosida chop qilingan nashrlaridan o‘zbek tilida Ozarbayjonning buyuk shoiri Nizomiy Ganjaviy “Xamsa” asarining maxsus nashri, “Vatan uchun jon fido qilgan qahramonlar”, “Kitobi Dada Qoʻrqit” dostoni, “Sayid Azim Shirvoniy g‘azallari” kabi nashrlar, monografiyalar, shuningdek, “Xurshidga yetar boshim - Xurshidbonu Notavon”, “Men haqiqatning ovoziman - Ahmad Jovad”, “Alisher Navoiy hikmatlari”, “Ozarbayjon va o‘zbek xalq maqollari” kabi 2 tillik nashrlar, “Haydar Aliyev 100 hikmat” kabi 3 tillik nashr, “Shusha - Turk dunyosining madaniyat poytaxti” nomli 5 tillik ensiklopedik nashr, shuningdek, Ozarbayjon davlatchiligi, tarixi, madaniyatiga doir kitoblar ham taqdim etildi.
22.12.2023
