XƏBƏRLƏR 2017
Daşkənddə “Xalqların adət-ənənələri və milli yeməkləri” adlı 15-cü xeyriyyə festivalı keçirib.
Özbəkistan Xarici İşlər Nazirliyinin diplomatik servis xidməti “Uzekspomərkəz” sərgilər mərkəzinin həyətində “Xalqların adət-ənənələri və milli yeməkləri” adlı 15-cü xeyriyyə festivalı keçirib.
Festivalda Özbəkistanda fəaliyyət göstərən səfirliklər öz xalqlarının adət-ənənələri və milli yeməklərini nümayiş etdiriblər.
Tədbirdə ölkəmizi Azərbaycanın Özbəkistandakı səfirliyi və bu qurumun nəzdindəki Azərbaycan Mədəniyyət Mərkəzi təmsil edib.
Tədbirdə Özbəkistanda akreditə olunmuş xarici ölkələrin səfirləri və beynəlxalq təşkilatların nümayəndələri, Azərbaycan səfirliyinin və Daşkənddəki Heydər Əliyev adına Azərbaycan Mədəniyyət Mərkəzinin əməkdaşları, diasporumuzun üzvləri, jurnalistlər iştirak ediblər.
Diplomatik servis xidmətinin rəhbəri Abduraşid Kayumov festivalın əhəmiyyəti haqqında söhbət açıb, deyilib ki, xalqların bir-birini daha da yaxından tanımasında belə tədbirlərin əhəmiyyəti böyükdür.
Azərbaycan tərəfi ənənəvi olaraq Festivalda builki iştirakını da ulu öndər Heydər Əliyevin doğum gününə həsr edib.
Azərbaycan Mədəniyyət Mərkəzi üçün ayrılmış guşədə ölkəmizin bayrağı, ulu öndər Heydər Əliyevin həyat və fəaliyyəti, Prezident İlham Əliyevin rəhbərliyi ilə Azərbaycanda həyata keçirilən islahatlar haqqında kitab və albomlar, Qarabağın milli qadın və kişi geyimləri, Qarabağ xalçaları, suvenirlərimiz nümayiş etdirilib.
Xalqımızın tarixi, ədəbiyyatı, mədəniyyəti ilə əlaqədar nəşrlər, milli musiqi alətləri, milli məişət əşyalarımız buraya gələnlərin diqqətini çəkib.
Guşədə qonaqlara milli xörəklərimiz, o cümlədən dolma, plov, dovğa, kükü, qutab və digər təamlarımız təklif olunub.
Tədbirin sonunda festivalın münsiflər heyəti iştirakçıları mükafatlandırıb. Səfirliyimiz və Heydər Əliyev adına Azərbaycan Mədəniyyət Mərkəzi festivalda aktiv iştirak etdiyinə görə səfir Hüseyn Quliyevə diplom və qiymətli hədiyyələr təqdim edilib.
13.05.2017