XƏBƏRLƏR 2018
Özbəkistandakı Heydər Əliyev adına Mədəniyyət Mərkəzinin direktoru
Samir Abbasov TÜRKSOY təşkilatının xüsusi medalı ilə təltif olunub.
Azərbaycanın Özbəkistandakı Səfirliyinin nəzdindəki Heydər Əliyev adına Azərbaycan Mədəniyyət Mərkəzinin direktoru Samir Abbasov TÜRKSOY təşkilatının xüsusi medalı ilə təltif olunub.
Bildiyimiz kimi, Azərbaycanın dahi şairi Molla Pənah Vaqifin 300 illik yubileyi ilə əlaqədar TÜRKSOY- Beynəlxalq Türk Mədəniyyəti Təşkilatı 2017-ci ilin “Molla Pənah Vaqif ili” elan olunması barədə Sərəncam imzalayıb.
Bununla əlaqədar TÜRKSOY təşkilatı tərəfindən çoxsaylı tədbirlər, bir sıra layihələr həyata keçirilib.
Həyata keçirilən unikal layihə kimi Molla Pənah Vaqifin seçilmiş əsərləri dünya dillərində kitabı toplu halında çap edilib.
Topluda şeirlər 12 dildə, o cümlədən Azərbaycan, türk, özbək, qazax, qırğız, türkmən, başqırd, tatar, habelə ingilis, italyan, rus və Ukrayna dillərində verilib.
Kitabda Özbək dilində bölmənin hazırlanması, layihənin həyata keçirilməsində Özbəkistandakı Heydər Əliyev adına Azərbaycan Mədəniyyət Mərkəzinin xüsusi dəstəyini nəzərə alan TÜRKSOY təşkilatının baş katibi Düsen Kaseinov Mədəniyyət Mərkəzinin direktoru S.Abbasovu medalla təltif edib.
Qeyd edək ki, 2016-cı ildə TÜRKSOY təşkilatının layihəsi ilə “Bəxtiyar Vahabzadə türk dillərində” kitabının Özbək dili versiyasının hazırlanmasına görə S.Abbasova təşəkkür elan edilib.
15.01.2018