XƏBƏRLƏR 2019
Özbəkistan mətbuatının nümayəndələrinin Azərbaycana “Mediatur”u uğurla başa çatıb.
Özbəkistandakı Heydər Əliyev adına Azərbaycan Mədəniyyət Mərkəzinin layihəsi ilə Özbəkistanın aparıcı media nümayəndələri, televiziya kanallarının jurnalistlərinin iştirakı ilə cari il 23-30 mart tarixlərində Azərbaycana Mediatur təşkil olunub.
Nümayəndə heyətinə qardaş ölkənin tanınmış media qurumları, telekanallar, aparıcı saytların rəhbərləri və təmsilçiləri daxil edilib.
Özbəkistandakı Azərbaycan Mədəniyyət Mərkəzinin direktoru Samir Abbasovun müşaiyət etdiyi nümayəndə heyəti Azərbaycan xalqının Ümummilli Lideri Heydər Əliyevin məzarını, Şəhidlər xiyabanını ziyarət etmiş, qonaqlara ölkəmizin əldə etdiyi nailiyyətlər, icra olunan nəhəng layihələr, milli mədəniyyətimiz, turizm sahəsində həyata keçirilən işlər, Ermənistan – Azərbaycan, Dağlıq Qarabağ münaqişəsi haqqında geniş məlumat verilib.
Özbək jurnalistlər Bakı və respublikanın regionlarında ictimai yerlərdə, maraqlı məkanlarda, mədəniyyət, turizm obyektlərində olaraq, ölkəmizin təbliği məqsədi ilə çoxsaylı verilişlər, məqalələr hazırlayıblar.
Səfər proqramına əsasən qonaqlar cari ilin 24 mart tarixində Qusar rayonuna səfər edib, Şahdağ qış-yay turizm kompleksində çəkilişlər aparb, 25 mart tarixində isə Qubada olaraq azərbaycanlıların soyqırım Muzey Kompleksi ilə tanış olaraq burada çəkilişlər aparıblar.
Bundan başqa, Mediatur iştirakçıları 25 mart tarixində Şamaxı rayonuna səfər edərək, Şamaxı Cümə məscidi, Şamaxı rayonunun tarixi məkanı olan Dəmirçi kəndində olmuş, çəkilişlər aparmışlar.
Mediatur zamanı Bakıda Beynəlxalq Mətbuat Mərkəzində Azərbaycan və Özbək alimlərinin iştirak etdiyi “Nəsimi və Özbək ədəbiyyatı” adlı Beynəlxalq Elmi Konfrans keçirilib.
Azərbaycanın tarixi və qədimi “Kaspi” qəzeti ilə Özbəkistanın ən çox oxunan “Qalampir” xəbər saytı arasında əməkdaşlığa dair Memorandum imzalanıb. Nümayəndə heyəti “Kaspi” qəzetinin redaksiyasında olaraq gündəlik iş prosesi ilə tanış olublar.
Qonaqlara “Kaspi” qəzeti adından ziyafət verilmişdir.
Qeyd edək ki, Özbəkistanın aparıcı media qurumlarının təmsilçilərinin iştirak etdiyi “Mediatur” faydalı və uğurlu olmuş, Azərbaycanın paytaxtı Bakı, regionları haqqında Özbək mətbuatında çoxsaylı verilişlər və məqalələr yayımlanır.
01.04.2019