XƏBƏRLƏR 2019
Özbəkistanın “Sevimli” televiziya kanalında Azərbaycanla bağlı geniş videomaterial yayımlanıb.
Özbəkistanin “Sevimli” televiziya kanalının “Zamon” proqramında Dilnoza Saidovanın Azərbaycanla bağlı geniş videomaterialı yayımlanıb.
Videomaterial bu yaxınlarda Daşkənddəki Heydər Əliyev adına Azərbaycan Mədəniyyət Mərkəzinin təşəbbüsü ilə bir qrup özbək jurnalistinin Azərbaycana mediaturu çərçivəsində hazırlanıb.
Materialda Fəxri Xiyaban haqqında danışılır, bildirilir ki, burada Azərbaycanın tanınmış siyasət, elm, mədəniyyət, incəsənət xadimləri, ömrünü Vətənin inkişafı və çiçəklənməsinə həsr edən insanlar uyuyur.
Çəkiliş qrupu Azərbaycan xalqının ümummilli lideri Heydər Əliyevin məzarını ziiyarət edib. Jurnalist Heydər Əliyevin dünya şöhrətli böyük siyasi xadim olduğunu, Azərbaycanın inkişafı və dünyada tanıdılması üçün danılmaz xidmətlər göstərdiyini diqqətə çatdırır. Sonra çəkiliş qrupu tanınmış həkim Zərifə Əliyevanın qəbrini ziyarət edib, məzarına çiçək dəstələri düzüb.
Bildirilir ki, hər gün buraya əllərində çiçək dəstələri olan yüzlərlə insan gəlir.
Sonra onlar SSRİ xalq artistləri Bülbül, Rəşid Behbudov və Müslüm Maqomayevin, Özbəkistanda çox məşhur olan “Qaynana” filminin qəhrəmanı, Xalq artisti Nəsibə Zeynalovanın qəbirlərinə çiçək dəstələri qoyublar.
Çəkiliş qrupu Şəhidlər Xiyabanında da olub, 20 yanvar şəhidlərinin və Qarabağ müharibəsində Vətənin azadlığı və müstəqilliyi uğrunda canlarını fəda edən şəhidlərin məzarlarına çiçək dəstələri düzüblər.
Jurnalist Qəbələ, Qusar rayonlarına səfəri haqqında da söhbət açır, Şahdağ istirahət mərkəzində xizək sürür.
03.04.2019