XƏBƏRLƏR 2020
Ölkəmiz “Infolib Uzbekistan – 2020” IX Milli informasiya-kitabxana həftəsində təmsil olunub.
Özbəkistandakı Heydər Əliyev adına Azərbaycan Mədəniyyət Mərkəzi Əlişir Nəvai adına Milli Kitabxanada keçirilən “Infolib Uzbekistan – 2020” IX Milli informasiya-kitabxana həftəsində iştirak edib.
Azərbaycan Mədəniyyət Mərkəzinin “Azərbaycan-Odlar diyarı” adlı guşəsindəki kitablar arasında ulu öndər Heydər Əliyevin həyat və fəaliyyəti, Prezident İlham Əliyevin rəhbərliyi ilə ölkəmizin iqtisadi inkişafından bəhs edən kitablar, “Qarabağ həqiqətləri” seriyasından Heydər Əliyev Fondu tərəfindən rus və ingilis dillərində çap edilən nəşrlər təqdim edilib. Kolleksiyada Azərbaycan Mədəniyyət Mərkəzinin özbək dilində Azərbaycanın tarixi, dövlətçiliyi, mədəniyyəti, ədəbiyyatı ilə bağlı Daşkənddə çap etdirdiyi kitablar, habelə Qarabağ münaqişəsinə dair nəşrlər də yer alıb.
Sərgidə Mədəniyyət Mərkəzinin özbək dilində çap etdirdiyi böyük Azərbaycan şairi Nizami Gəncəvinin “Xəmsə”si, İmadəddin Nəsiminin “Cananı sevərmən”, “Azərbaycanca-özbəkcə, özbəkcə-Azərbaycanca lüğət” kitabları, Azərbaycan-Özbəkistan ədəbi əlaqələri mövzusunda əsərlər və digər nəşrlər də olub.
Kitabxana direktorunun müavini Nəsibə Xoldorova informasiya-kitabxana həftəsinin əhəmiyyətindən danışıb, iştirakçı təşkilatlara və kitabxanalara, o cümlədən Heydər Əliyev adına Azərbaycan Mədəniyyət Mərkəzinə təşəkkürünü bildirib.
Azərbaycan Mədəniyyət Mərkəzinin direktor müavini Polad Zeynalov Azərbaycan-Özbəkistan dostluğundan, Mədəniyyət Mərkəzinin Milli Kitabxana ilə əməkdaşlığından, birgə keçirilən tədbirlərdən danışıb, mərkəzin əməkdaşı Kifayət Pirməmmədova Mədəniyyət Mərkəzinin özbək dilində çap etdirdiyi kitablar haqqında məlumat verib.
Bildirilib ki, tədbirin sonunda sərgidə nümayiş etdirilən kitablar Milli Kitabxanaya hədiyyə olunacaq.
19.11.2020
