XƏBƏRLƏR 2022
Daşkənddə keçirilən “Kitab həftəsi”ndə Azərbaycan Mədəniyyət Mərkəzi də iştirak edib
Daşkənddəki “Turan” Kitabxana-İnformasiya Mərkəzində “Kitab həftə”si keçirilib.
“Kitab həftəsi”ndə Özbəkistandakı Heydər Əliyev adına Azərbaycan Mədəniyyət Mərkəzi də iştirak edib.
Azərbaycan üçün ayrılmış guşədə ölkəmizin bayrağı, ulu öndər Heydər Əliyevin həyat və fəaliyyəti, Prezident İlham Əliyevin rəhbərliyi ilə ölkəmizin iqtisadi inkişafından bəhs edən kitablar, Heydər Əliyev Fondu tərəfindən “Qarabağ həqiqətləri” seriyasından rus və ingilis dillərində çap edilən nəşrlər, Azərbaycanın tarixi və mədəniyyəti ilə bağlı əsərlər nümayiş etdirilib.
Nəşrlər arasında Azərbaycan Mədəniyyət Mərkəzinin özbək dilində çap etdirdiyi böyük Azərbaycan şairi Nizami Gəncəvinin “Xəmsə”si, İmadəddin Nəsiminin “Cananı sevərmən”, “Azərbaycanca-özbəkcə, özbəkcə-Azərbaycanca lüğət” kitabları, Azərbaycan-Özbəkistan ədəbi əlaqələri mövzusunda əsərlər və digər nəşrlər olub.
Azərbaycan Mədəniyyət Mərkəzinin naxıştikmə və rəsm dərnəyi üzvlərinin əl işləri və suvenirlər də maraqla qarşılanıb.
Kitabxana-İnformasiya Mərkəzinin direktoru Dildora Abduazizova tədbiri açaraq kitabın həyatımızdakı rolundan danışıb, gənclərə kitab oxumağı məsləhət görüb.
Sonra Azərbaycan Mədəniyyət Mərkəzi “Əməkdar artist Kaykep Aliyeva adına Azərbaycan qızları” uşaq rəqs ansamblının üzvləri milli rəqslərimizi ifa ediblər.
19.04.2022