XABARLAR 2024
O‘zbekistonda Ozarbayjonning “Zafar kuni” munosabati bilan kitob taqdimoti bo‘lib o‘tdi.
Ozarbayjonning O‘zbekistondagi elchixonasi qoshidagi Haydar Aliyev nomidagi Ozarbayjon Madaniyat Markazi tomonidan Ozarbayjon Respublikasi Madaniyat vazirligi ko‘magida nashr etilgan Ozarbayjon Milliy Qahramoni Iskandar Aznaurovga bag‘ishlangan “Vatan uchun jonini fido qilgan qahramonlar” (“Vətən üçün can fəda edən qəhrəmanlar”) nomli kitobning Toshkent iqtisodiyot va pedagogika institutida “Zafar kuni” munosabati bilan taqdimoti bo‘lib o‘tdi.
Mazkur oliy ta’lim muassasasi rektori, professor Shakarboy Joniqulov tadbirni kirish so‘zi bilan ochib, Ozarbayjon yerlari 30 yildan ortiq vaqtdan beri armanlar ishg‘oli ostida bo‘lganligi va bu hududlarda armanlar tomonidan keng ko‘lamli vandalizm harakatlari sodir etilganini ta’kidladi. Qorabog‘dagi bosib olingan yerlarimizdagi tarixiy obidalarimiz, masjidlarimiz armanlar tomonidan butunlay vayron qilinganini, ikkita masjidimizda cho‘chqa boqilayotganini qayd etgan rektor armanlarning Ozarbayjon xalqiga bo‘lgan adovatining ildizi ularning butun turkiy xalqlarga bo‘lgan adovatida ekanligini ta’kidladi, hali bundan 100 yil avval armanlar tomonidan Farg‘onada, Marg‘ilonda, Qo‘qonda o‘zbek xalqiga nisbatan dashnoqlar tomonidan sodir etilgan vahshiylik va jinoyatlar haqida gapirdi. S.Joniqulov o‘zbek xalqi bundan o‘ttiz yil avval yonida bo‘lgani kabi Ozarbayjon xalqi bilan birga ekanini aytib, bu birlik zamirida qadimiy tarixiy ildizlarimiz turganini ta’kidladi.
Undan keyin chiqish qilgan O‘zbekistondagi Haydar Aliyev nomidagi Ozarbayjon Madaniyat Markazi direktori Nodir Alimirzayev Qorabog‘ urushidan, arman tajovuzkorligidan so‘z ochib, O‘zbekiston davlati va xalqining hamisha yonimizda bo‘lishini, Ozarbayjonning haqli kurashini qo‘llab-quvvatlaganini eslatdi. Ozarbayjon Prezidenti Janob Ilhom Aliyevning uzoqni ko‘zlagan siyosati, irodasi Ozarbayjon askarlarining jasorati, shahidlar qoni, joni evaziga nihoyat tuproqlarimizning 28 yildan so‘ng dushman toptaganidan ozod qilinganini ta’kidlagan N.Alimirzayev barcha shahidlar bilan birga Iskandar Aznaurovning qoni yerda qolmaganini aytib o‘tdi. 8-noyabr kuni Qorabog‘ toji va Ozarbayjon madaniyatining beshigi hisoblangan Shusha shahrining ozod qilingani sanasining Ozarbayjon xalqi tomonidan Zafar kuni sifatida nishonlanganini ma’lum qilgan N.Alimirzayev Ozarbayjon Respublikasi Prezidenti Janob Ilhom Aliyevning farmoniga asosan bu tarixning Zafar kuni sifatida qayd etilganini ta’kidladi. Ma’ruzachi bugun bosqindan ozod etilgan yerlarda katta qurilish ishlari olib borilayotgani, majburiy ko‘chirilganlar o‘z ona yurtiga qaytib, avvalgi hayotiga qaytganini, bu qurilish ishlarida O‘zbekiston davlatining ham o‘rni borligini aytib o‘tdi.
Keyinchalik so‘zga chiqqan professor Ma’rufjon Yo‘ldoshov Ozarbayjon Madaniyat Markazi tomonidan chop etilgan mazkur kitobning yosh avlodni qahramonlik ruhida tarbiyalashdagi ahamiyati haqida gapirdi.
Keyinchalik so‘zga chiqqan filologiya fanlari bo‘yicha falsafa doktori Karimulla Mammadzoda ikki davlat oʻrtasidagi madaniy-adabiy aloqalarga toʻxtalar ekan, Ozarbayjon Madaniyat Markazining bu boradagi faoliyati, ayniqsa, mazkur markaz tomonidan amalga oshirilayotgan nashriyot loyihalari haqida gapirdi. Uning ta’kidlashicha, mazkur nashrning asosiy maqsadi Ozarbayjon xalqining suvereniteti va hududiy yaxlitligi uchun olib borayotgan kurashini o‘zbek kitobxonlariga yetkazish, yosh avlodni milliy vatanparvarlik ruhida tarbiyalashga xizmat qilishdir.
Tarixchi olim dotsent Asror Qayumov bu xalqlar orasida ozarbayjonliklar qatorida armanlarning turkiy xalqlarga nisbatan tarixiy dushmanligi haqida gapirdi, o‘zbeklar ham armanlar tomonidan genotsid va qirg‘inlarga uchraganini eslatdi.
Tadbirda qatnashgan askar polkovnik Noryigit Dusanov tarixiy qahramonlik mavzulari yosh avlod tarbiyasida muhim o‘rin tutishini bildirib, Ozarbayjon Milliy Qahramoni Iskandar Aznaurovning Birinchi Qorabog‘ urushidagi ko‘rsatgan jasorati haqida hikoya qiluvchi kitob bu boradagi muhim manba bo‘lishini alohida ta’kidladi.
Yakunda tadbir ishtirokchilariga Iskandar Aznaurovning hayoti va jangovar yo‘lini aks ettiruvchi hujjatli film taqdim etildi.
O‘zbekistondagi Haydar Aliyev nomidagi Ozarbayjon Madaniyat Markazi tomonidan o‘zbek tilida nashr etilgan va marhum jurnalist-tadqiqotchi Mavlon Shukurzoda muallifligidagi kitobda O‘zbekistonda tug‘ilib, urushda shahid bo‘lgan Ozarbayjon Milliy Qahramoni Iskandar Aznaurovning hayoti, kurash yo‘li, urush yo‘li, quroldoshlari, uni yaqindan bilganlar, oilasining u bilan bog‘liq xotiralari ham o‘rin olgan.
06.11.2024
