XƏBƏRLƏR 2021
Azərbaycanlı alimin mühazirəsi dinlənilib
Əlişir Nəvai adına Daşkənd Dövlət Özbək Dili və Ədəbiyyatı Universitetində Özbəkistandakı Heydər Əliyev adına Azərbaycan Mədəniyyət Mərkəzinin təşəbbüsü və layihəsi ilə yaradılan Məhəmməd Fizuli adına Azərbaycan mədəniyyəti, Təhsil və Tədqiqat mərkəzində Azərbaycan Memarlıq və İnşaat Universitetinin dosenti, füzulişünas alim Lalə Əlizadə Azərbaycan ədəbiyyatına dair mühazirə oxuyub.
Tədbirdə universitetin professor-müəllim heyəti, tələbələr iştirak ediblər.
Əvvəl Məhəmməd Fizuli adına mərkəzinin rəhbəri, dosent Gülbahar Aşurova Azərbaycan dilinin, ədəbiyyatının, mədəniyyətinin təbliği məqsədilə yaradılan mərkəzin fəaliyyətindən danışıb. O, mərkəzdə azərbaycanlı alimlərin, şairlərin, yazıçıların iştirakı ilə müxtəlif görüşlərin, mühazirələrin, yubileylərin, açıq dərslərin, sərgi və seminarların təşkil olunacağını vurğulayıb.
Lalə Əlizadə bildirib ki, biz əlamətdar bir ildə görüşürük. Belə ki, Azərbaycan Prezidenti İlham Əliyev Nizami Gəncəvinin 880 illiyi ilə bağlı 2021-ci ili “Nizami Gəncəvi İli” elan edib. Özbəkistanda isə bu il böyük özbək şairi Əlişir Nəvainin 580 illiyi qeyd olunur. Şərqin hər iki dahi şairi ilə bağlı türk dünyasında və bir sıra digər dövlətlərdə tədbirlər keçirilir, onların əsərləri təkrar-təkrar dərc olunur. Tanınmış özbək şairi Əlişir Nəvai böyük Azərbaycan şairi Nizami Gəncəvinin “Xəmsə”sindən təsirlənərək türk dilində “Xəmsə” yaradıb.
Natiq ta qədim zamanlardan Azərbaycan şair və yazıçılarının dostluğundan danışıb, bu dostluğun bir örnək olduğunu diqqətə çatdırıb.
L.Əlizadə Azərbaycan torpaqlarının işğaldan azad edilməsindən də söz açıb. O bildirib ki, 2020-ci il sentyabrın 27-də Azərbaycan Prezidenti İlham Əliyevin rəhbərliyi, əsgər və zabitlərimizin şücaəti ilə Ermənistanın 30 ilə yaxın işğal altında saxladığı torpaqlarımız 44 gün ərzində azad olundu. Torpaqlarımız işğal altında olarkən barbar ermənilər şəhər və kəndlərimizi, məscid və ziyarətgahlarımızı dağıdıb, bu torpaqlarda əsl vandallıq siyasəti həyata keçiriblər. Ermənilər bu vandalizm və vəhşiliyi də öz tarixlərinə yazdılar.
Dosentlər Jasur Ziyamuxammedov, Kəramət Mullaxujayeva və başqaları Özbəkistanla Azərbaycan arasında ədəbi əlaqələrin daha da inkişaf etdirilməsi, Özbəkistanda Azərbaycanın, Azərbaycanda isə Özbəkistanın daha geniş tanıdılması, habelə Azərbaycan ədəbiyyatının, mədəniyyətinin və tarixinin qarşılıqlı öyrənilməsi məsələlərindən danışıblar.
Sonda tələbələr Azərbaycan və Özbəkistan klassik şairlərinin şeirlərini söyləyiblər.
21.11.2021
