Ozarbayjon madaniyat vazirligi “Islom merosini o'rganamiz” loyihasini taqdim etadi
Ozarbayjon Madaniyat vazirligi "Islomiy merosimizni o'rganamiz" loyihasini amalga oshirishga kirishdi.
Loyiha doirasida Islom madaniyati yodgorliklari to'g'risidagi qisqa metrajli videoroliklar tayyorlanadi va taqdim etiladi.
Tayyorlangan birinchi videorolik Ganja shahridagi "Imomzoda" diniy majmuasiga bag'ishlangan.
"Imomzoda" Ganja shahridan etti kilometr uzoqlikda, Ganja davlat tarixiy-madaniy qo'riqxonasi hududida joylashgan. G'ishtin qabr atrofida kichik masjidlardan, karvon-saroy kabi uylardan, ravoq va tosh hamda g'isht devorlar bilan o'rab olingan yordamchi binolardan tashkil topgan diniy majmua yaratilgan.
Majmua ichida "Moviy gumbaz", "Moviy masjid" yoki "Moviy Imom"deb nomlanuvchi qabr bor. Mamlakatimizning eng qimmatbaho me'moriy yodgorliklaridan biri hisoblangan maqbarada beshinchi Imom Muhammad Bag'irning o'g'li Ibrohim dafn etilgan.
Turli vaqtlarda vayron qilingan bu ziyoratgoh 1946dan beri "Imomzoda" maqbarasi bo'lib xizmat qiladi. Keyingi yillarda, ayniqsa, umummilliy lider Haydar Aliyev Ozarbayjonga rahbarlik qilgan davrda majmuada tarixiy obida sifatida ta'mirlash-tiklash ishlari olib borildi. Sovet davrida bu rasmiy davlat ro'yxatidan o'tgan yagona ziyoratgoh edi. Ganjaning qadimiyligini tasdiqlovchi ushbu diniy yodgorlik ayni vaqtda shaharning Islom dunyosidagi ahamiyatini namoyish etadi.
Doimo mamlakatning diniy-tarixiy yodgorliklarini to'liq tiklash va ularni kelajak avlodlar uchun saqlab qolishga katta e'tibor bergan Ozarbayjon Prezidenti Ilhom Aliyevning ko'rsatmasiga ko'ra, 2010-2015-yillarda "Imomzoda" majmuasida kapital ta'mirlash va rekonstruksiya ishlari amalga oshirildi.
Eslatib o'tamiz, ilgari Ozarbayjon madaniyat vazirligi tomonidan "Xristian merosimizni o’rganamiz" loyihasi amalga oshirildi, unda Davlat tomonidan himoyalangan cherkovlar va Ozarbayjonda xristian diniga oid boshqa ibodatxona va qadamjolar haqida videolar taqdim etildi.