XABARLAR 2022
Do‘stlik jamiyati bilan Ozarbayjon-O‘zbekiston tashkilotlari hamkorligini rivojlantirish masalalari muhokama qilindi.
O‘zbekistondagi Haydar Aliyev nomidagi Ozarbayjon Madaniyat Markazi direktori Samir Abbasov O‘zbekiston-Ozarbayjon Do‘stlik Jamiyati Ijrochi direktori, professor Erkin Nuriddinov bilan uchrashdi.
Ozarbayjon Madaniyat Markazida bo‘lib o‘tgan uchrashuvda Prezident Ilhom Aliyevning O‘zbekistonga tashrifidan so‘ng hamkorlik bo‘yicha ochilgan yangi imkoniyatlar, O‘zbekiston va Ozarbayjon oliy o‘quv yurtlari o‘rtasidagi aloqalarni yanada kengaytirish, ta'lim sifati va samaradorligini oshirish, ta'lim muassasalari o‘rtasida o‘qituvchilar va talabalar almashinuvi bo‘yicha hamkorlik, Nizomiy nomidagi Toshkent Davlat Pedagogika Universiteti rahbariyatining Ozarbayjonga tashrifi va Ozarbayjonning tegishli universitetlari bilan uchrashuvlar o‘tkazish, O‘zbekistonda bo‘lib o‘tadigan Ozarbayjon kinosi kunlari va Ozarbayjonda o‘tkaziladigan Boku Xalqaro Kitob Yarmarkasida ishtirok etish, ushbu tadbirlarga tayyorgarlik ko‘rish, ikki mamlakat o‘rtasida tarixiy do‘stlik va hamkorlik bo‘yicha qo‘shma loyihalarni amalga oshirish masalalari muhokama qilindi.
Uchrashuvda Erkin Nuriddinov Samir Abbasovga ko‘p yillik izlanishlari natijasi bo‘lgan, Ozarbayjon-O‘zbekiston tarixiy do‘stligi va hamkorligiga bag‘ishlangan monografiyaning dastlabki versiyasini taqdim etdi va monografiyada aks etadigan mavzular bo‘yicha fikr almashildi. Monografiya bu yil O‘zbekistondagi Haydar Aliyev nomidagi Ozarbayjon Madaniyat Markazi loyihasi doirasida nashr etiladi.
Uchrashuvda Samir Abbasov Buxoroda dafn etilgan mashhur Ozarbayjon mutafakkiri Yusif Qorabog‘iyning xotirasini abadiylashtirish va shu maqsadda Ozarbayjon Madaniyat Markazining O‘zbekiston-Ozarbayjon Do‘stlik jamiyati bilan birgalikda tashabbus ko‘rsatishi va tegishli tuzilmalar bilan ishlash to‘g‘risidagi taklif bilan chiqdi.
Shuni alohida ta'kidlash lozimki, Yusif Qorabog‘iy o‘z ilmi va adabiy faoliyati bilan O‘rta Osiyoda, hozirgi O‘zbekiston hududida mashhur bo‘lgan, o‘z davrining obro‘li ilm-fan va din arbobi edi.
25.08.2022